#GlobalGanesha अंतर्गत युनायटेड किंगडम (यू के) मध्ये चक्क चाळीस पेक्षा अधिक ठिकाणी सार्वजनिक गणेशोत्सव साजरा करण्यात आला आहे. यंदा न भूतो असाच हा गणेशोत्सव साजरा केला जात असून त्याविषयी लंडन येथून सुप्रसिद्ध व्यवसायी आणि लंडन पंढरपूर वारीचे प्रणेते अनिल खेडकर यांनी या लेखाद्वारे मांडलेला आढावा..
#GlobalGanesha म्हणजेच बाप्पाचा उत्सव यंदा वैश्विक स्तरावर सर्वत्र मोठ्या प्रमाणात साजरा करण्यात येत असल्याचे दृश्य जगभरात दिसत आहे. “गणपती बाप्पा मोरया… पुढच्या वर्षी लवकर या!” या जयघोषाने यंदा केवळ आपल्या महाराष्ट्राची किंवा आपली भारत भूमीच नव्हे, तर जागतिक पातळीवर वैशिष्ट्यपूर्ण पध्धतीने दिमाखात साजरा केला जात आहे. अगदी हजारो मैल दूर असलेला युनायटेड किंगडमचा (यूके) विविध परिसर देखील या जयघोषाने घुमून निघाला आहे, असे म्हटल्यास वावगे ठरणार नाही. यूकेतील विविध शहरांमध्ये राहणाऱ्या मराठी बांधवांनी अन्य भारतीय वंशाच्या बांधवांसोबत एकत्र येत या वर्षीचा गणेशोत्सव २०२६ अत्यंत दिमाखात आणि भक्तिमय वातावरणात साजरा केला आहे.
लंडन, मँचेस्टर, बर्मिंगहॅम, लेस्टर, रीडिंग आणि ब्रिस्टल यांसारख्या प्रमुख शहरांसह यूकेभरातील ४० हून अधिक महाराष्ट्र मंडळे आणि मराठी समुदाय संस्थांनी या भव्य उत्सवाचे दरवर्षी पेक्षा मोठ्या प्रमाणात आयोजन केले. परदेशात स्थायिक होऊनही आपली मातृभूमी, संस्कृती आणि परंपरांशी असलेले घट्ट नाते या सोहळ्याच्या माध्यमातून पुन्हा एकदा अधोरेखित झाले.
#GlobalGanesha : सांस्कृतिक कार्यक्रम अन् परंपरांचा जप
यंदा देखील उत्साहाने गणेश उत्सवाच्या काळात घराघरांत आणि स्थानिक समुदाय केंद्रांमध्ये आकर्षक सजावट करून बाप्पाची स्थापना करण्यात आली. दिवसभरात नेटकेपणाने आरती, भजन आणि महाप्रसादाचे भव्य आयोजन करण्यात आले होते. ढोल-ताशांचा गजर, लेझीमची तालबद्ध पावले, मराठी गाणी, अभंग, कीर्तन, नृत्य आणि नाट्याविष्कारांनी यूकेतील वातावरण पूर्णपणे ‘महाराष्ट्रमय’ करून सोडले.
पुढच्या पिढीला संस्कृतीचा वारसा
जगभरात गणेशोत्सव हा केवळ भारतीयांचा धार्मिक सोहळा नसून समाजाला एकत्र आणणारा अन् नव्या पिढीला आपल्या मुळांशी जोडणारा दुवा ठरला आहे. या उत्सवात भारतीय आणि खासकरून मराठी कुटुंबांतील बालगोपाळांपासून ते ज्येष्ठांपर्यंत सर्वांनीच उत्स्फूर्त सहभाग नोंदवला. लहान मुलांनी पारंपरिक वेशभूषेत सहभागी होत मराठी संस्कृतीचे दर्शन घडवले. पालकांनी जपलेला हा सांस्कृतिक वारसा पुढच्या पिढीपर्यंत पोहोचवण्याचे मोलाचे काम या माध्यमातून झाले.
यूकेतील ४० हून अधिक मंडळांचा एकत्र सहभाग हि विलक्षण घटना असून त्यामागील तेथील मराठी समाजाची एकजूट, सक्रियता आणि संस्कृतीबद्दलचे अथांग प्रेम नक्कीच दिसून येते. “महाराष्ट्राची माती दूर असली, तरी संस्कृती हृदयात जिवंत आहे” या भावनेने भिजलेल्या या उत्सवाने जिथे मराठी माणूस आहे, तिथे बाप्पाचा उत्सव आणि आपलेपणाचा आनंद असतो हे पुन्हा एकदा बाप्पांच्या उत्सवाने सिद्ध केले आहे.
बाप्पाला निरोप देताना सर्वांच्याच मनात भक्तीचा ओलावा आणि पुढच्या वर्षाची उत्सुकता पाहायला मिळाली आहे.
विशेष म्हणजे, अनेक ठिकाणी लहान मुलांनी पारंपरिक वेशभूषेत सहभागी होत आपल्या संस्कृतीचा परिचय करून घेतला. पालक आणि ज्येष्ठांनी जपलेल्या परंपरा पुढच्या पिढीपर्यंत पोहोचवण्याचे सुंदर काम या गणेशोत्सवातून घडले.
४० हून अधिक महाराष्ट्र मंडळांचा सहभाग ही केवळ एक संख्या नाही; ती यूकेतील मराठी समाजाच्या एकजुटीची, सक्रियतेची आणि आपल्या संस्कृतीवरील प्रेमाची साक्ष आहे.
महाराष्ट्रापासून हजारो मैल दूर असलो, तरी बाप्पाच्या भक्तीत अंतर कधीच आड येत नाही.
जिथे मराठी माणूस, तिथे गणपती बाप्पाचा उत्सव — आणि जिथे बाप्पा, तिथे आपलेपणा, आनंद आणि एकत्रितपणा!
यंदाचा गणेशोत्सव संपताना मनात एकच भावना…महाराष्ट्राची माती दूर असली, तरी महाराष्ट्राची संस्कृती आपल्या हृदयात सदैव जिवंत आहे.
